Skulptura, programimi dhe humori

Edicioni i tetë u mbajt të shtunën, më 19 prill 2014, në kafenenë e re n'dritare 2, afër teatrit të Ferizajt. Folësit ishin një skulptor inovator nga Ferizaji, një programer që punonte me gjeneratat e reja të programerëve dhe një nga pionierët e emisioneve humoristike në Kosovë.

Përparim Behluli, skulptor nga Ferizaji, foli për punimet e tij: dy skulptura të përfunduara dhe tri të tjera në punë e sipër. Tregoi si ndërtoi skulptura unike me shufra metali dhe poliester, dhe si i priti shoqëria idetë e tij.

Driton Haxhiu, nga kompania teknologjike Meduza, foli për projektin „Programerët e rinj”, në bashkëpunim me Innovation Centre Kosovo (ICK). Tregoi si edukohej një gjeneratë e re programerësh në ICK, me çfarë metodash mësonin dhe pse Ferizaji dhe Kosova kishin nevojë për më shumë programerë të rinj.

Heset Maliqi (Quza), drejtor i kompanisë Quza Art, foli për emisionet humoristike dhe satirike të kompanisë, për sukseset e tyre dhe për risitë që solli, si animacioni 3D për herë të parë në Kosovë. Tregoi edhe përvojën e tij si shkrues në gazeta dhe si i priti shoqëria shkrimet e tij.

Organizuar nga të rinj aktivistë nga Ferizaji, me mbështetjen e IPKO Foundation.