Demokracia, shoqëria civile dhe drejtësia tranzicionale

Edicioni i 15-të u mbajt më 28 mars 2015 në sallën e konferencave të Orchide-së dhe trajtoi demokracinë, rolin e shoqërisë civile në të dhe drejtësinë tranzicionale.

Alban Haliti, drejtor ekzekutiv i OJQ-së INPO, foli për rëndësinë e demokracisë për shoqërinë, për punën e INPO-s në këtë drejtim dhe për rolin kyç të të rinjve. Prezantoi edhe mundësitë që ofron European Youth Foundation, ku INPO ishte anëtarësuar së fundmi, dhe lidhjet e organizatës me fondacione ndërkombëtare për të rinjtë.

Rinor Beka, menaxher i Programit Legjislativ të National Democratic Institute (NDI), punonte për programet që e ndihmojnë Kuvendin e Kosovës të ushtrojë funksionin përfaqësues, ligjvënës dhe mbikëqyrës. Foli për punën e NDI-së dhe për rëndësinë e shoqërisë civile, me shembuj edhe nga SHBA-të.

Bekim Blakaj, drejtor ekzekutiv i Fondit për të Drejtën Humanitare Kosovë (FDHK), foli për humbjet në njerëz gjatë luftës në Kosovë, për të dhënat statistikore mbi viktimat dhe për bazën e të dhënave të Librit të Kujtimit të Kosovës. Shpjegoi shkurt edhe mekanizmat e drejtësisë tranzicionale dhe rolin e tyre për një paqe të qëndrueshme.

Organizuar nga një ekip vullnetarësh të rinj nga Ferizaji, me mbështetjen e IPKO Foundation.