Gruaja në shoqëri dhe barazia gjinore

Edicioni i 16-të u mbajt më 18 prill 2015 në sallën e konferencave të Orchide-së. Pas edicionit për demokracinë, ky i kushtohej rolit të gruas në shoqëri, fuqizimit të saj dhe edukimit të djemve për barazinë gjinore.

Lebibe Topalli-Shabani, piktore, mësuese e artit figurativ dhe kryetare e shoqatës së artistëve të Ferizajt „Zef Kolombi”, foli për punimet dhe ekspozitat e saj dhe si përmes artit ka paraqitur rolin e gruas në shoqëri.

Edita Veseli, menaxhere programesh në Women for Women International për Kosovën, foli për organizatën e themeluar në vitin 1993 dhe të pranishme në Kosovë që nga viti 2000, që mbështet gratë në rajonet e pasluftës me ndihmë financiare, mbështetje emocionale, trajnime për aftësi pune dhe edukim për të drejtat e tyre, që të rindërtojnë jetën.

Kadri Gashi, koordinator i Klubit „Bonu Burrë”, prezantoi këtë nismë të djemve të rinj në Ballkan: si i mëson të rinjtë për stereotipat që u vihen djemve dhe si i sfidon ato, për barazi gjinore dhe kundër dhunës, homofobisë dhe etiketimeve.

Organizuar nga të rinj aktivistë nga Ferizaji, me mbështetjen e IPKO Foundation.