Thyerja e barrierave mes komuniteteve

Edicioni i 22-të, i fundit për vitin 2015, u mbajt të martën, më 22 dhjetor, në sallën e konferencave të Orchide-së. U fol për thyerjen e barrierave të komunikimit mes komuniteteve në Kosovë dhe për diskriminimin racor, nacional dhe për shkak të orientimit seksual, përmes hulumtimeve, projekteve vetëdijësuese dhe një shfaqjeje teatrore.

Valentina Abazi prezantoi një hulumtim që kreu me ekipin e saj për problemet me të cilat përballen komunitetet serb, turk, boshnjak, goran dhe rom, ashkali e egjiptian në Kosovë.

Liridon Veliu, bashkëdrejtor ekzekutiv dhe menaxher programesh në Qendrën për Emancipim Shoqëror (QESh), shpjegoi konceptet bazë të terminologjisë LGBT, objektivat dhe aktivitetet e QESh-it, si dhe projektin „Kosovo is Ready” (KiR), të mbështetur nga USAID.

Shpëtim Selmani foli për shfaqjen teatrore „Enciklopedia e të gjallëve”, një bashkëpunim serbo-kosovar për problemet mes komunitetit serb dhe atij shqiptar: idetë nacionaliste, arsyet absurde dhe politikën që çuan në luftë. Prezantoi edhe librin e tij më të ri, „Shënimet e një grindaveci”.

Organizuar nga ekipi organizativ lokal i BarCamp Ferizaj, me mbështetjen e IPKO Foundation.