Fluturime supersonike dhe maja malesh

Edicioni i 18-të u mbajt të martën, më 30 qershor 2015, në sallën e konferencave të Orchide-së, me përvojat e pilotit të parë shqiptar të aeroplanëve supersonikë dhe të një alpinisti nga Ferizaji.

Ali Aliu, piloti i parë shqiptar që drejtoi aeroplanët reaktivë dhe supersonikë të ish-Armatës Popullore Jugosllave, tregoi si e nisi karrierën, si u regjistrua në shkollën e aviacionit dhe përvojat nga rreth 6 mijë fluturime, me mbi 2700 orë fluturimi, nga të cilat rreth 2200 orë me aeroplan supersonik.

Kushtrim Palushi, avokat me profesion, foli për aktivitetet sportive rekreative si ecja në natyrë, çiklizmi dhe vrapimi, dhe për rëndësinë e aktivitetit fizik për një jetë të shëndetshme. Tregoi përvojat e tij të fundjavës, përfshirë ngjitjen në dy majat më të larta të Ballkanit: Olimpin në Greqi dhe Musalën në Bullgari.

Organizuar nga të rinj aktivistë nga Ferizaji, me mbështetjen e IPKO Foundation.